بلال کمالی:لعنت اؤزومه ....

 

لعنت اؤزومه ....

 

گوز یاشلاریمین دامجی لاری داشلاری قازدی

گؤردوم آدینی آخیر اولار داشلاری یازدی

 

اوولده گرک من بو گونون فیکرین ائدئیدیم

لعنت اؤزومه ایندی منه نئیله سه  آزدی

 

بیر ساده باخیش باخدیم اوگون من اونا آمما

یوخ جنبه اوره کده  آخی  تئز یولدان او آزدی

 

آلدیم خبر آخیر نه ائدیب سن  اوره یه  سن

سووزگون گؤزونون گؤرمه یینه بیر بئله بازدی؟

 

بیر حسرتیلن باخدی منه سؤیله دی بدبخت

منله  اوره یین  اؤز آرامیزدا...  اودا  رازدی

 

هردن اوره یه حاق وئریره رم فیکر ائله یه نده

آخیر گورورم هم باخیشی هم اؤزو  نازدی

 

بلال کمالی

حمید عموزین الدین موسوی:گؤزو دار دونیا

 

گؤزو دار دونیا

 

چوخ یاخینلاشما اوزاق گز ، اوره ییم اوددو منیم

اَلینی وورما، قیزارمیش چؤره گیم اوددو منیم

 

چؤلومه باخما اومودسوز یاغیشیم سئل گتیره ر

گزه بیلسن باغیمی گز! چیچه ییم اوددو منیم

 

یارا قوربان کسیبن اوزده، یادی گؤزله ییریک

باخیشیم قان یاغیر آنجاق، ببه ییم اوددو منیم

 

گؤزو دار دونیانی سئومک پئشه میزدیر ، ایشه باخ!

یانیرام آرزیلار ایچره، دیله ییم اوددو منیم

 

جالانیب گؤز یاشیم  ایستی کوله جوهر یارانیب

قلمیم داشماز  اَییلمز، بیله ییم اوددو منیم

 

قوی دئییم من کیمی سانجیب متحیّر آریمیز

دادا بیلمز بو بالیمدان، پته ییم اوددو منیم

 

حمید عموزین الدین موسوی

محمد نصیرزاده:قارا تئل

 

قارا تئل

 

کؤنلوم دولاشیب قاره تئله شانه یه بنزه ر

محکوم اولوب اول زنجیره دیوانه یه بنزه ر

 

چیخماز  قارا زولفون حصاریندان دَلی کؤنلوم

محبوس اولوب جسمده بی دانه یه بنزه ر

 

پروانه نئجه عشق اودونون دورینه گزمیش!

منده گزه رَم  باشیوا پروانه یه بنزه ر

 

به به ، نه گؤزل اَیله شیب عشقین بو اورکده

عشقین قیزیلا، قلب ده ویرانه یه بنزه ر

 

سودای من و زلف سیاهین گؤزلیم باخ

شیرین ناغیلا ، سئومه لی افسانه یه بنزه ر

 

محمد نصیرزاده